الجمعة، 11 ديسمبر، 2009

فى حب مصر ... أكتب ولأول مرة


كنت بتفرج على حلقة من برنامج القاهرة اليوم لعمرو أديب والحقيقة أن "عمرو" سأل سؤال بقالى أكتر من حوالى 4 أيام وأنا بسأله لنفسى وأنا بتفرج خلالهم على أحتفال الشقيقة دبى باليوم الوطنى لها على كل قنواتها الفضائية، ومشهد كل الناس قدامى وهما لابسين علم بلدهم، قد أيه جميل .. مافيش أعلامى ولا فنان ولا صحفى ولا أى مواطن أماراتى ظهر على الشاشة الا ولابس علم وطنه.
السؤال اللى سألته لنفسى مع أحترامى لكل أشقائنا العرب، ليه مصر معندهاش "يوم وطنى" زى ده ... أحنا بنملك التاريخ اللى الكتير منهم ميملكوش .. يبقى ليه؟ ليه يومنا الوطنى ينحصر فقط فى ماتش كورة .. ليه مشوفش الشباب المصرى ماشى فى الشوارع بيحتفل بحب مصر زى ما بيحتفل بيوم "الفلانتين" كل سنة ومصر كلها فجأة بتتحول فى اليوم ده وبقدرة قادر الى اللون الأحمر واللى مش بيلبس أحمر فى اليوم ده ويشيل هدية تحمل نفس اللون تقريبا بيبقى شكله غريب.
ليه منحاولش نرجع الأنتماء للشباب ده، شباب مصر بجد أحسن شباب فى الدنيا مش عشان هما أخواتى وأصحابى وأنا واحدة منهم لكن عشان بجد أثبتوا للعالم كله مدى حبهم وأنتمائهم لمصر على الأقل فى الأزمة السابقة عكس كل ما كانوا يتهمونا به من أننا جيل تافهه لا يملك الهدف والقضية، النهاردة أثبتوا بجد أنهم بيحبوا مصر حتى لو كان كده من غير مقابل .. فى شباب كتير من اللى خرجوا فى الشوارع يتظاهروا يمكن يكونوا حتى مش لاقيين شغل لكن لما حسوا بالأهانة خرجوا كلهم فى حب مصر من غير أى حسابات.
خلاصة الكلام .. نفسى نحب نفسنا أكتر من كده .. ونحاول نعملها حاجات كتير .. ونفتخر بمصريتنا أكتر من كده لأن مصر تستاهل .. أحنا نملك حضارة وفن وثقافة وعلم وتاريخ ورياضة لينا فى كل مجال رمز مشرف.
وده هينقلنى لسؤال تانى مهم جدااا بجد محيرنى .. ليه دايما نجاحتنا بتبقى فردية، ليه دايما بتتمثل فى رموز فردية ... "زويل – البردعى – محفوظ – مشرفة " وغيرهم كتير.
ليه معندناش ثقافة الجماعة .. ودايما الناس تسأل هو أحنا ليه بنحب الكورة قووى كده ويمكن أكتر من باقى الرياضات اللى حقها مهضوم ؟
بأختصار لأنها هى العمل الوحيد الجماعى اللى بننجح فيه .. طيب ليه ميبقاش اليوم المقترح ده هو نقطة الأنطلاق لفكرة العمل الجماعى .. يوم قائم على أضافة شئ جديد لمصر كل سنة فيه نتبنى فكرة ونحققها زى مثلا سنة نتبنى حملة لنضافة الشوارع وكل واحد ينضف قدام بيته، سنة نتبنى حملة لزرع شجرة قدام كل بيت .. سنة نحاول نعيد مثلا لوسط البلد جمالها ورونقها بأننا نحاول نغير من أشكال الفاترينات اللى فيها بتوحيدها مثلا برعاية كبرى شركات مصر .. سنة نضع فيها بلازمات فى الشوارع كلها أغانى وطنية وكليبات لرموز مصر فى كل مجال .. وفى كل سنة نكرم الرموز الناجحة فى السنة السابقة لها فى كل مجال مش بس الفن والرياضة أفكار وأفكار كتير قووى.
وفى النهاية أتمنى أننا فى 2010 نعيش ولو يوم واحد نتجمع فيه كلنا فى حب مصر رافعين فوق رؤوسنا 3 ألوان أحمر ... أبيض ... أسود بكل فخر وأعتزاز .. فأرفع رأسك يا أخى .. لأنك بأختصار ابن مصر.

هناك تعليق واحد:

  1. جميل ما قرأت والأجمل مجهودك الطيب ..

    تحياتى وكل عام وأنت بألف خير ..

    ردحذف