الأربعاء، 18 مارس، 2009

رجعت للصفر .... من مكان ما بدأت


أيام وأسابيع و شهور بتعدى وقلمى لسه مش قادر يكتب حاجه ليها معنى لدرجة أنى فقدت الأمل أنه يكتب تانى.

نفسى أكتب قصه جديدة بس مش عارفه ابدأ أزاى فيه أفكار فى دماغى بس مش عارفه ارتبها صح.

ساعات كتير ببقى مضايقه من حاجات كتير ومش عارفه اتكلم مش عشان أنا فقدت القدره على الكلام لا سمح الله لكن عشان كلامى مش بيتسمع أصلا.

لسه بتكلمنى فى نفس المواضيع ونفس المشاكل نفسى أقولها بس كفايه هو انتى مابتزهئيش أبدا أنا زهقت اسكتى بقه.

أجمل حاجه فى الدنيا أن الأنسان يكتشف دايما الحاجات الحلوة فى حياته.

لا لا أجمل حاجه فى الدنيا الورد الأبيض، كتاب حلو غالبا لأنيس منصور، غنوه حلوه للعندليب أو فيروز، فيلم لتامر حبيب على وزن العشق والهوى، رباعيه لصلاح جاهين، وصوت سعاد حسنى وهى بتقول :الدنيا ربيع والجو بديع قفلى على كل المواضيع.

أجمل فيلم لسعاد حسنى غروب وشروق مهما اتفرجت عليه عمرى ما ازهق منه .

بس السؤال اللى محيرنى يا ترى سعاد حسنى انتحرت ولا اتقتلت؟

يعنى انتحرت ولا اتقتلت هتفرق فى ايه، النتيجه واحده، بس أحنا اللى بنحب نسأل كتير.
كتبت فى أبريل 2008

هناك تعليق واحد: