الاثنين، 30 مارس، 2009

فى ذكــرى حليــــــــــــــــــــــــم



والأن أعزائى القراء وبعد أن شاهدنا هذا الفيلم القصير عن نجمة الألفيه الثالثه منى زكى أدعوكم لمتابعة برنامج مع الذكريات وحلقة اليوم عن العندليب الأسمر عبد الحليم حافظ.

ماتفرحوش أووى كده لسه .... لسه فى فاصل أعلانى ..... لو حد عايز يقوم يأيله نص ساعه مافيش مانع.

أنتم الأن تشاهدون برنامج مع الذكريات .... القناه الأولانيه

( أعلانات)
هاتلنا ريرى ..... هاتلنا ريرى .... هاتلنا منه باكو اتنين ... الصلاة ع الزين ..... الصلاة ع الزين

أعزائى المشاهدين أهلا ومرحبا بكم فى حلقه جديده من برنامج مع الذكريات، والنهارده حلقتنا هتكون عن العندليب الأسمر عبد الحليم حافظ فى ذكراه التى تجاوزت الثلاثون عاما ولازال حليم يتربع على عرش النجوميه محفورا فى قلوب محبيه ومحبى الفن الجميل .... (أهوأهوأهو المذيعه بتكح عادى بنى أدمه يا جماعه).

عفوا .... ( وتكمل) أرى البعض منكم وقد ألتف حول شاشات التليفزيون منتظرا أن يعرف الجديد عن حياة مطربه المفضل ولكن لالالالالالا أعزائى المشاهدين، لأنه كما عودكم برنامجى أن يبحث عن كل جديد، فقد جأتكم اليوم بما هو جديد، سنتحدث اليوم عن ذكرياتى مع العندليب، أرى أحد المشاهدين ... عفوا أقصد القراء وقد فتح فمه مرددا (جرى أيه يا ست ... ألحق ياباه دى طالعه تتكلم عن نفسها).

وأرد قائله عيب كده يا معلم استنى لأخر الحلقه وبعدين أحكم، ولو مش عاجبك كده من أولها خلاص قوم أنزل محل الجزاره بتاعك شغلك محتاجلك أكتر من التليفزيون، ولو أن انا عارفه قعدتك قدامه دى سببها أيه أصلك بتنش يا ولداه (هو فى حد بقى يشترى لحمه).

نعود الى سابق حديثنا بعد أن وضعنا كل واحد عند حده، نعود الى الرومانسيه الى الأحلام الى الذكريات الى الفارس الجميل اللى جاى على حصان أبيض ولكـــــــــــــــــــــــــــــــــــن ......... بعد الفاصل.
( أعلان)
والواد كان عنده حق.. عرفه الجامع... أوعى تقوليله لا... عرفه الجامع ....

هي كلمه طول ما ندى ضهرنا للترعه عمر البلهارسيا فى جتتنا ماترعى....


عدنــــــــــــــــــــــــــــــــا

أهلا بكم مرة أخرى أعزائى المشاهدين ..... عفوا القراء .... اليوم وكما حدثتكم قبل الفاصل سأتحدث عن ذكرياتى عن العندليب، وأقول ...... عندما أتذكر حليم أتذكر معه:

(1)

خالى وهو قاعد على الكنبه فى بيتهم وقدامه عشرات الشرايط ال (Albums) يعنى، أنا بقول الشرايط لأن وقتها كان أسمها كده، يعنى يجى كده نقول من 16 سنه أو يمكن أكتر، المهم قاعد وقدامه الشرايط دى ومنها يجى 5 شرايط كده لعبده زى ما كان بيقول عليه، الشريط لونه رمادى كده وعليه ورقه لبنى مكتوب عليها صوت الفن بالأتفاق مع كايرو فون تقدم عبد الحليم حافظ، وتحت مكتوب باحلم بيك - خساره - أول مره - عقبالك يوم ميلادك - تخونوه - ياقلبى خبى.

خاله: يلا يا مها افتحى الكاسيت ...... ها أنا لسه قايلك أمبارح أول زرار على اليمين .... أيوه كده شاطره، حطى الشريط .... رجعيه من الأول ..... أيوه كده .... يلا شغلى بقى.

حليـــــم : باحلم بيك أنا بحلم بيك .... وبأشواقى مستنيك .... وأن مسألتش فيه .... يبقى كفايه عليا ..... عشت ليالى هنيه بحلم بيك .... أنا بحلم بيك.

أسأل : هو أنت لازم يعنى كل ما تيجى تكوى هدومك تشغل عبد الحليم.

خالى : أه عادى يعنى فى حاجه مضايقه سيتك.

أرد : لالالا عادى بس على فكره أنا بحب أغنية راح ( ملحوظه: من يومى وأنا فقريه).

خالى : طاب روحى هاتى الشريط اللى على الكومودينو اللى جوه فى أوضتى هو ده بتاع راح.

أحط الشريط فى الكاسيت ....

حليـــــــــم : راح ... راح خد قلبى وراح .... خد أملى وراح .... خد نور أحلامى ... خد من أيامى كل الأفراح ... وراح ... راح ... راح.

أسأل تانى : هو مين اللى راح يا خاله.

خالى بأبتسامه خبيثه : اللى بيغنيله الأغنيه، واسكتى بقى قلبتى دماغى، وغيرى الشريط ده وحطى أسمهان.

أرد : لالالالالا والنبى يا خاله خلى راح أنا بحبها قووووووووى.


(2)

فى بيتنا الساعه 3 الضهر يوم الجمعه قاعده مستنيه الغدا، أيام ما كنت بستناه، ماما فى المطبخ كالعادة، وأنا قاعده قدام التليفزيون ماسكه الكشكول فى أديه ( قال أيه بذاكر) ثانويه عامه بقى وكده، و ماما واقفه فى المطبخ زى ما قولتلكوا من شويه والمسافه بين المطبخ والصاله مش كتير يعنى فى ثانيه ألاقيها قدامى، ويبقى ساعتها الفاس وقعت فى الراس، حليم قدامى فى التليفزيون فى فيلم بنات اليوم، بيغنى لماجده.
حليم : أهواك... وأتمنى لو أنساك... وأنسى روحى وياك... وأن ضاعت تبقى فداك لو تنسانى.
هو فى الحقيقه ماكنش بيغنيها لماجده زى ما كلنا عارفين، ده كان بيحب أختها، بس الأغنيه جامده الصراحه، مش عارفه ليه كل ما أتفرج على الفيلم ده أتخيل سعاد حسنى هى اللى واقفه قدامه (مع أحترامى الشديد لماجده طبعا).
أقوم أبص بصه كده على المطبخ نشوف ايه الأخبار.
أنا : على فكره فيلم بنات اليوم ده أحلى فيلم لعبد الحليم، فيه شوية أغانى خصوصا أهواك.
ماما : لأ طبعا أحلى فيلم لعبد الحليم معبودة الجماهير ( أصل ماما بتحب شاديه )، وعلى فكره بقى أغانيه أحلى ده كفايه بلاش عتاب.
أرد : لا ده بس عشان فيه ست شاديه.
ماما : طبعا.
أرد : يادى ست شاديه، على فكره بقى فاتن حمامه أحسن منها بكتير، طاب دى حلوه قوووووى مع حليم فى موعد غرام.
ماما : لا طبعا شاديه أحسن بكتير، كفايه أنها المطربه الوحيده اللى بتعرف تمثل، ويمكن كمان أحسن من الممثلين نفسهم.
أرد : ماما بقولك أيه هو أحنا هناكل أمتى.
بعد الغدا بيجى ساعتين كده، قاعده قدام التليفزيون برضه، ونفس الكشكول والملزمه فى أديه، الفيلم خلص، بحول للقناة التالته، لقيت برنامج أغانى جايب أغنية بلاش عتاب.
أنا : ماما ..... ماما .... ألحقى أغنية بلاش عتاب جت أهى.
ماما : هو أنتى مش هتقفلى التليفزيون ده بقى شويه وتذاكريلك كلمتين.
أنا بكلم نفسى : وجنت على نفسها مراكش، أنا اللى جبته ده كله لنفسى ...... أنا اللى جبته دة كله لنفسى.
حليم مستمر فى الغناء : بلاش عتاب لو كنت حبيبى ..... من العذاب أنا خدت نصيبى ..... ماتكلمنيش ع الحب ... متفكرنيش بالحب .... لا حياتى هى حياتى ولا قلبى أصبح قلب .......


(3)

فى ميدان الجيزه الساعه يجى كده 8 بالليل، مروحه مع ماما البيت، وفجأة شفت بياع شرايط كاسيت فارش على عربيه كده، بيبع شرايط مضروبه، عمرى ما أشتريت منها مش عشان بس حفاظا ودعما لحقوق الملكيه الفكريه لاقدر الله لكن عشان غالبا الشرايط دى بيبقى صوتها وحش وبتسف كمان وغالبا بتبوظلى الكاسيت من تانى مره أسمعها، بس اللى لفت نظرى المره دى أنه كان فيه عنده شريط كوكتيل لحليم عشان أجمعه عايزه أشترى كده يجى 5 أو 6 شرايط، والشريط ال (Original) أيامها كان يجيله كده ب 7 جنيه بعد ما غلى، طاب وعلى ايه أجرب الشريط ده.
أنا : ماما بقولك أيه ما تيجى أشترى من الراجل ده شريط حليم.
ماما : أيوه وتسيبى المذاكرة بقى وتقعدى تسمعيه يا بنتى أمتحانات التيرم قربت، خليكى تخلصى الكليه دى على خير.
أرد : معلش والنبى يا ماما النهارده الخميس وده يوم أجازتى من المذاكره وبعدين ده فيه أغانى حلوه قوووى أستحاله أقدر أجمعها كده،ألحقى يا ماما ده فيه كل أغانى معبودة الجماهير جبار – حاجه غريبه – لست قلبى – أحبك ( بحاول أضغط عليها ).
ماما : أيوه بس ده مافهوش بلاش عتاب.
أسأل البياع : والنبى شفلنا كده كوكتيل تانى فيه بلاش عتاب والنبى.
البياع : أهو يا أنسه فيه بلاش عتاب وباقى أغانى معبودة الجماهير.
أنا : ها يا ماما أشتريه؟؟؟
ماما : خلصينى.
أول ما روحت جربت الشريط لاقيت صوته تمام، وتانى يوم بحطه فى الكاسيت لاقيته مش عايز يشتغل، الكاسيت سكت ماحطش منطق، ايه فى ايه ، أدى أخرة الشرايط المضروبه، وفجأه أكتشفت أن العيب من السلك، يااااااااااه حقيقى على رأى حليم ظلموه، فى ثوانى كنت نزلت وأشتريت سلك جديد، وجربت ياااااااااااه الحمد لله أشتغل.
حليم : يا حبيبى عشت أجمل عمر فى عنيك الجميله عشت أجمل عمر ...... أوصل الأيام مع الأحلام فى غنوة شوق طويله عشت أجمل عمر......


(4)

فى بيتنا الساعة 4 صباحا فاتحه التليفزيون على القناة الأولى وواقفه بكوى هدومى ( جينات بقى، والأيام دول، الله يرحمك يا خالى )
عبد الحليم قدامى زى كل يوم فى الميعاد ده لازم القناة الأولى قبل ما تقفل تجيب حفلة لحليم، ده طبعا أيام ما كانت القنوات بتقفل، والله مش من بعيد ده الكلام ده وأنا فى البكالوريوس، من حوالى 5 سنين كده.
حليم : خايف ومشيت وأنا خايف ..... أيدى فى أيدك وأنا خايف ...... خايف على فرحة قلبى ...... خايف على شوقى وحبى ......
بغنى معاه : لا أنا قد الفرحه ديه ..... وحلاوة الفرحه ديه ........ خايف لا فى يوم وليله مالائكشى بين أيديه ...... تروح وتغيب تغيب عليه ...... وقولتلى يا حبيبى ساعتها ساعتها دى دنيتى أنت اللى ماليتها .... وفى عز الكلام سكت الكلام ..... وأتارينى ماسك الهوا بأديه وأه من الهوا يا حبيبى أه يا حبيبى ......وخدتنى يا حبيبى وخدتنى يا حبيبى وروحت طاير طاير ..... وفوتنى يا حبيبى وقلبى حاير حاير .....




(5)

من كام يوم كده كانوا جايبين لحليم حفله بمناسبة ذكراه وكانت أغنية قارئة الفنجان، كل مره أقول عايزه أتفرج على الأغنية دى كامله، أصل الأغنية دى هى اللى كانوا بيقولوا أن حليم أتخانق مع الجمهور فيها بصراحه عمرى ما صدقت، أصل مش ممكن حليم يعمل كده، هو أصلا بيعرف يتخانق زيينا كده، عبد الحليم اللى هرنا رومانسيه وتسبيل طول عمره لالالالا مش مصدقه وفجأة فى وسط الأغنيه.
حليم يغنى : بصرت ... بصرت ونجمت كثيرا ... ولكن لم أقرأ أبدا فنجانا يشبه فنجانك ....
وبعض من الجمهور بيصفر وحليم بيغنى .... حليم وشه يتقلب ويوقف غنا لثوانى، والموسيقين شغالين عادى، ويرجع يغنى تانى عادى.
أنا أقول لنفسى : يا سلام هو ده اللى أتخانق مع الجمهور .... صحيح عالم مفتريه ..... ولا يمكن هو كده بالنسبه لهم أتخانق، مش عارفه والله .
وشويه وحليم خلص الكوبليه ووقف شويه ساكت، وقال للجمهور.
حليم : أنا على فكره كمان أنا بعرف أصفر .... وبعرف أتكلم وبعرف أزعق .... هاااااااا وراح مصفر.
أيه ده أيه ده ..... ده حليم هو اللى أعترف بنفسه أنه بيتخانق ..... حتى أنت يا حليم .....
حليم : بحياتك يا ولدى أمرأة ....... عيناها سبحان المعبود ....... فمها مرسوم كالعنقود ..... ضحكتها أنغام وورود ...... والشعر الغجرى المفرود يسافر فى كل الدنيا ...... قد تغدو أمراة يا ولدى يهواها القلب هى الدنيا .
والأن أعزائى المشاهدين ...... أقصد القراء قد وصلنا الى أخر الحلقه اليوم من البرنامج مع وعد منا بلقاء جديد وحلقه جديده من برنامجكم مع الذكريات، تصبحوا على خير.

هناك 10 تعليقات:

  1. ايه الجمال والروعة دي يامها بصي بقى احلى حاجةان اول ما تقري الموضوع لازم يتصدق مش مجرد اضحوكة والسلام عشان حاسة بكل كلمة قولتيها وكتبتيها وحاجة جميلة ان يكون ندى ايامك ذكرياتك بحلوها ومرها وكمان بالنسبة لراح خالي اللي راح ياخد احزانك ميخدش اي حاجة تانية.
    اجمل شئ في الدنيا الصدق واحلى حاجة في حياتنا الذكريات برافو عليكي يامها جمعتي بين احلى اتنين ودايماً يارب ذكراياتك تبقى حلوة على طول .
    على فكرة جميلة اهواك وانا بهواكي .
    Dina khatab

    ردحذف
  2. يعنى أقول أيه يا دندونة حياتى ميرسى يا حبيبتى.

    ردحذف
  3. hayeeeeeeeeel ya maha 7elw moooooooooooot bgd
    Asmaa Salah at 8:37pm April 12

    ردحذف
  4. والله بموت فى عبد الحليم ....بعيشى و تفتكرى
    Mohamed Hasan Enany at 2:37am April 13

    ردحذف
  5. و انت من اهله يا مها بجد جميل ان كل واحد يحكى زكراه مع الانسان اللى بيحبه زى ما انا كدة حكيت زكرياتى مع شاهين ... جميلة جدا يا مها و مكنتش اعرف ان ليكى فى التنكيت جديدة دى
    Mahmoud Gamal El-Din at 10:21am April 13

    ردحذف
  6. دي عايزة قعدة مخصوص وبعد كده أرد عليكي :)
    Islam Maher at 5:27pm April 13

    ردحذف
  7. Asmaa merci ya Amar w da ba3d mema 3ndkom.
    Mohamed meciiiiiiii gedan.
    Mahmoud i'm waiting 4 ur memories about Shahine, really i wanna read it.
    Islam i'm waiting 4 ur comment soooon.

    ردحذف
  8. الموضوع كبير يا مها بس بصراحه بنفعى مذيعه فى التوك شو
    Mohamed Hasan Enany at 1:53am April 14

    ردحذف
  9. أولا انا آسف على التأخير في الرد

    ثانيا
    تسلم ايدك من هنا للصبح
    ...
    فنانة بجد يا مها .. اوعي توقفي كتابة
    Mahmoud Amin So'ody at 1:27am April 16

    ردحذف
  10. Merciiiiiiiiii ya Mahmoud aho enta elly FANAN begad, w agmad kateb wallahy, yala ba2a feeeeeen ketabk 3yza A2rah SOOOOOOOON.

    ردحذف