ساعات ... ساعات 1

ساعات بتخيل أن سقف الأوضه هيقع عليه مش عارفه ليه وأفضل مبحلقه فيه ومستنياه يقع لمدة ثوانى بجد نفسى أتخلص من الأحساس ده.

ساعات وأنا راكبه التاكسى أفضل باصه من الشباك على كل حاجه بتتحرك حوليه بلاقى ان كل حاجه من صنع الأنسان اكيد لازم تكون حاجه مضره أو بمعنى أصح حاجه ضررها أكبر من نفعها لكن الأكيد ان فى حاجات تانيه كتير بتبقى جميله وصافيه لأنها مش من صنع بنى ادم، السما بيبقى شكلها حلو قوى لكن العمارات العاليه بتشوه منظرها جدااااااااااااااااااااااااااااااااا.

ساعات بقعد اسال نفسى هو انا ليه ربنا اختار لى حياتى انها تكون على الأرض ليه متكونش فى اى كوكب تانى المريخ مثلا، ويا ترى لو كنت اتولدت فى المريخ كنت هتمنى اجى الأرض والله كل شئ ممكن لو كمية الحقد والغيره والكراهيه والشر الموجودين على الأرض موجودين على المريخ يبقى ما فيش فرق خلينا على الأرض احسن واللى نعرفه احسن من اللى منعرفوش.

ساعات بحس انى لئيمه جدااااااااااااا لا لا سيئة الظن لالالالا ده انا طيبه والله ده الحوار اللى داير جوايه طول النهار عامل زى دبانه غتته عماله تزن فى ودانى انا قررت استخدم فليت يا اما اديها بالشبشب ما انا هخلص منه يعنى هخلص منها.

ساعات ....ساعات احب عمرى واعشق الحاجات.

كتبت فى 22 يوليو