أسف على الأزعاج

عندما يتحايل الأنسان على الواقع يزعج نفسه قبل الأخرين فهو يتحايل عليه بأن يرجع بالزمن الى الوراء أو العكس يتوقع ويتخيل أشياء لم تحدث بعد وهذا ما ازعجنى عندما شاهدت أسف على الأزعاج.

ساعات الأنسان بيبقى بيتمنى ترجع أيام هو أكتر واحد عارف كويس اوى أنها استحاله ترجع يمكن عشان الأشخاص اللى راحوا عمرهم ما بيرجعوا لكن ساعات بتعدى علينا لحظات نحاول فيها نعيش الماضى ده بأننا نحاول نرجعهم فعلا فقط فى خيالنا وفى نفس الوقت دايما بيبقى فى ناس لسه موجودين بنحاول نتوقع منهم حاجات بنشوفها بس فى خيالنا ونعيش معاهم حياه بنتمناها.

أحمد حلمى كان دايما هو الوحيد اللى بيقدر يضحكنى من كل الكومدينات الموجودين دلوقتى وده لأنه دايما بيعتمد على كوميديا الموقف وبيحترم عقلية المشاهد والنهارده هو بكانى فعلا فنان، بجد بحترم ذكائه وخطواته المحسوبه من أول مشهد ليه فى السينما من أول الأدوار البطوله التانيه الى البطوله المطلقه.

محمود حميده ده بقى كان ولازال فتى أحلامى من وأنا عندى 15 سنه بمووووووووووووووووووووت فيه بجد لكن الغريب أنى حسيت أنه كمان أب جميل جداااااااا وأتمنيت يبقى أبويه وكنت غيرانه من حلمى طول الفيلم، دوره أكتر من رائع وقدر يقنعنى فى مشاهد انه عايش ومشاهد النصف الأخير من الفيلم أنه ميت و مشاهده مع حلمى أكتر من رائعه.

منه شلبى دورها كان السهل الممتنع وديتو هايل مع حلمى من أول مره اشتغلوا فيها مع بعض فى كده رضا, أجمل حاجه فى الفيلم حواره الذكى جدااااااااااااااا واللى بيتألق فيه أيمن بهجت قمر فى تانى تجاربه السينمائيه.

مش عيب أن الأنسان يفضل بينه وبين الماضى خيط هو الوحيد القادر على وصله وقطعه ومش عيب أنه يعيش فى خياله مع ناس موجودين فعلا حياه بيتمناها بس العيب أنه يزعج نفسه ويزعج الأخرين بحاجات ممكن تسعده بدل ما تكون السبب فى أزعاجه.

كتبت فى يوليو 2008