الاثنين، 9 مارس 2009

بعد الفراق


بعيدا عن المسلسل اللى بجد تنبأتله من أول حلقه أنه هيبقى أجمد مسلسل السنه دى وده طبعا من أول ما سمعت أغنية أيمن بهجت قمر بصوت حسين الجسمى ولآن بطلته هند صبرى بكل عبقريتها وموهبتها وثقافتها وأحساسها واللى تحس كده أنها مصريه بجد من حوارى مصر وأتحدى أى ممثله مصريه تقدر تمثل بنت البلد زيها وهنروح بعيد ليه شوفوا غاده عادل فى مسلسل قلب ميت واحكموا بنفسكوا من فيهم بنت البلد المصريه.
بعيدا عن كل ده أحب أسأل سؤال هو ليه دايما الفراق مرتبط عندنا بأن فيه واحد فى الطرفين غلطان وحتى لو غلطان ومقدرش حبنا ده لازم يصعب علينا قووووى لأنه بالتأكيد خسر كتير ودايما هو بيبقى فى الموقف الضعيف مش الأقوى ابدا لأن الأنسان لما بيخسر حد نتيجه لأفعاله أعتقد انه بيبقى فى اللحظه دى أغبى أنسان فى الدنيا ويستاهل مننا العطف وساعتها بيبقى ربنا وكأنه بيقولنا مش هو ده اللى لازم نكمل معاه هو ليه حد يستاهله وانت ليك حد تستاهله وارجع واقول تانى ممكن الفراق يحصل من غير ما يبقى فى ظالم أو مظلوم الحالتين بيحصلوا، يمكن أكون بشوف أن الأنسان اللى بيقدر يحب بجد هو الأنسان الأقوى زى بالظبط الأنسان اللى بيقدر يسامح أعتقد انه بيبقى أقوى بكتير من أنسان ميملكش العفو عند المقدره.
وعلى فكره أحنا اللى بنرسم حياتنا وبنحدد شكلها سواء كانت حلوه او وحشه بشويه تصرفات ساعات بتبقى غبيه وعبيطه وهى دى اللى بتخلى يبقى فيه فراق وهى اللى بتحدد ايه اللى بعده ولو السؤال ليه بيحصل الفراق ؟
هيكون الرد لآن كل واحد ليه شخصيته ودماغه وطموحه وظروفه وبيئته واللى اكيد بتختلف عن الطرف التانى وجمب كل ده لو المصلحه لقيت خرم ابره تدخل منه هتبقى الأسباب كملت ويحصل الفراق واللى بعده لآن أحنا بالرغم من أننا بنسمع فيروز وحليم لكن المؤكد ان الزمن ده مش زمانهم.

هناك 6 تعليقات:

  1. انا معاكى تماما ان مش لازم يبقى فى حد غلطان و لا حد متبهدل لكن احنا كبشر بنحب يبقى عندنا شماعة او حائط مبكى او حاجة تصبرنا

    يعنى لو واحدة جوزها طلقها ...ز علشان تصبر نفسها او اللى حواليها يواسوها هيتقال
    هو الخسران...
    بكرة يتبهدل
    بكرة يرجع لك زاحف
    بكرة يعرف قيمتك
    انت تستاهلى سيد سيده

    كده يعنى

    مفيش حد بيقول النصيب و ده قسمتنا مع بعض و الله يسهل له
    Marwa Rakha at 10:00am September 16, 2008

    ردحذف
  2. right u r ya Maha..mesh lazem yekoon 7ad ghaltan..laken momken tekoon 3awamel el gaw kasaret 7agat gowana aw 7awalena..to2adi lelfora2..It's very nice ya Maha
    Aya Tohamy Radwan at 9:36pm September 16, 2008

    ردحذف
  3. معاك حق يا مها
    والاسوأ من كده لما حد فيهم يجرح في التاني ويذكر عيوبه للي حواليه وينسي كل شيء حلو عملهوله ويتذكر الشيء الوحش بس
    Islam Maher at 1:53am September 17, 2008

    ردحذف
  4. hmmm msh ha5las ana mn 7l2at el fora2 elli ento 3amlenha de!! :P:D:D:D
    ya Miho i agree with you bzyada w 22ry el comment elli katbto 3nd "a5ona el kbeer" Nash2at hatla2eh mtwafek m3aki kteer;)
    Nada Thakeb at 10:42pm September 17, 2008

    ردحذف
  5. مش لازم يكون حد غلطان
    لانهم هما لاتنين غلطانين اساسا
    الدنيا دى نصيب
    بنقابل ناس و بنسيب ناس
    هي الدينا كدة
    Mohamed Tohamy at 1:31pm September 18, 2008

    ردحذف
  6. Thank you begad ya Marwa 3la kalamek da 3la kol el comments elly betktebhally dayman, Nodaaa, Aya, Islam, Tohamy thank you, masha2 allah kol el nas ma3ya el mara de
    Maha Elenany at 7:04pm September 18, 2008

    ردحذف